Episodebeskrivelse
Vom Låden und vom Leben Nummer 38 - Geduld
(...wie immer zum hören und mitlesen oder lesen und mithören, ganz wie ihr wollt)
Vom Låden und vom Leben
(audiofile #38: Geduld)
(als Ergänzung zu Hammersbald)
Servus ihr Liem dord draußn,
heud isses amål widder soweid. Heud du i wieder fränggln. Awer - un des hab i scho a boarmål bewiesn - s gehd a ohne Grand. Dann nacherd hald a weng filosofisch.
Mei Deema is Geduld. Könnd "se männie scheids of Geduld" sei.
Oder mer könnds a ganz annersch aufzie, ehm als Kommunigazionsdeema. Der Sinn zwischn die Zeiln oder besser gsåchd zwischn die Wörder oder Subdexd. Weil s gibbd dodål unnerschiedliche, sozumsåchn fassd scho audodynamische Endwigglungen in Gschbrächn. Zum Beisbiel grichd wer was nein falschn Hals und is nacherd dodål aggressief. Oder mer dud aneinanner vorbeireed und gefühld goar nix verschde. Oder ehm blubberblasn ausm Mund rauslass, wo derre annere, also der Gschbrächsbaddner noch neddamål mid gschbrochener Schbråche in Zusammenhang bring kå. Ja echd, des gibbds.
Awer des isses gar nedd, wo ich heud drauf nauswill. Des war blos der Åfang. Manchmal bassierds, un es endwiggeld sich auf wundersame Weise a diefschürfendes Geschbräch aus alldächlichn Flosgln. Aus Smålldåg sozumsach. Des kann nacherd innem Daxi genauso bassier, wie innem Waddezimmer oder während enner Füsio oder Erchoderabbieschdund. Warum des nacherd so bassier dud, wäss ich echd ned. Da gibbds sicher a boar unnerschiedliche, möchliche Ursåchn.
Gloar. Kann sei, dass die zwä - oder mehr, wo sich unnerhåld du, a ähnliche Wellenlänge hamm, wie ma so schö sach dud. Kann a sei, dass dess Wedder eefach so schlechd is, dasses nix hergeb dud, um drüwer zu redd. Vielleichd gibbds da a meddafüsische Gründ oder esodärische. Awer eichndlich isses Wurschd, wieso und woher des komm dud. Weil wichdich is des Ergebnis - oder der Zugewinn, den wo mer vou sowas hamm kå. Und des is ned blos des wichdichsde, sonnern essenziell.
Schdell mer uns amål vor, ich liech bei meiner Erchoderabeudin oder Füsio oder wie ach immer. Und irchndwie kommd nacherd des Gschbräch auf Geduld. Würd sich ja åbied. Hab ich euch scho a boar mal verzähld, dass ich im ledzdn Jåhr Geduld und so a Ard Demud glernd habb. Gibbds a ann widzichn Beidråch üwer mein Füsio und mei Ergoderabeudin. Odder besser gsåchd sogar mid denne. Awer zurügg zum Deema. Geduld.
Also sinn mir aus bekanndn Gründn auf des Dema Geduld kommn. Und dann gabs des, was ganz früher im Bayrischen Rundfungg kommn is. Zuhören, endsbannen, nachdenggn. (gud, s wår zuschaun, awer des kammer schonnamål frei inderbrädier) Irchndwie simmer nacherd von enner Erkenndnis zur annern kommn. Und da dadran möcherd ich euch heud deilhab lass.
Der Åfang war, wie gesåchd, dass mer uns üwer Geduld als Duchnd unnerhald hamm. Wardscheins hab ich mid meim Bee ågfangd, und dass ich im ledzdn Jåhr Geduld glernd habb. A weng jednfalls. Also Geduld mid Zeuch, wo ich nix dran ändern kå. Wirglich ned mei Kernkombedenz. Immer noch ned. Awer…
Website: comicdealer.de

