Les Fartures

Les Fartures ñaz como blogue gastronómicu en 2007, un sitiu onde David Castañón percuerre los restoranes asturianos y fala d’ellos, siempres dende una perspeutiva cercana y positiva (en Les Fartures namás aconseyamos restoranes onde dir, non los sitios onde nun dir).

A los 10 años, esti trabayu s’axuntó nuna guía gastronómica colos meyores restoranes, n’asturianu y en castellán, que foi un ésitu de ventes, y tamién el puxu definitivu pa Les Fartures.

Dende entós, Les Fartures, amás d’aconseyar restoranes, medró nun sitiu onde asoleyar productos asturianos y lluchar pola so presencia na sociedá asturiana. Ya empezó a facer Les Farturrutes, rutes curties, la mayor parte pa tolos públicos, qu’acaben nun chigre, munchos dellos abondo desconocíos pa la mayor parte de la población asturiana y que nel próximu mes va salir a la venta nun nuevu llibru con una esbilla d’elles.

Les Fartures (lesfartures.com) tien más de 30000 siguidores nes sos redes sociales.

Esta filosofía, de dar a conocer nuevos sitios onde comer n’Asturies, y, a la vegada, aquellos que lleven munchos años pero, irónicamente, siguen siendo desconocíos n’Asturies, ye la que queremos llevar al programa de radiu “Les Fartures”.

Un proyeutu onde l’Asturies más tradicional y la más cimera convivan n’andecha para dignificar la gastronomía asturiana. Onde miremos más allá de la fabada ya’l cachopu, y amosemos la bayura gastronómica de los productos d’Asturies, dende’l mar a la montaña, dende oriente, hasta la fastera occidental.