De ersten 20 Kilometers

Dat gifft würkli keen annern Minsch op de Welt, mit den ick mi so fein verstoh‘ as mit mien Madam. Wi künnt över allns snacken un wi künnt tosom över den gröttsten Bleudsinn lachen, dat uns de Droon‘ lang de Backen löppt.
Jo, wi hebbt echt Glück hatt, dat wi uns funnen hebbt. Natüürli sünd wi ni jümmers över allns een‘ Meenung, un dat kann ook mol ’n dreeviddel Stünn duuern, wenn wi utklabüstert, wat dat to eeten geeven schall.
Liekers kriegt wi in de Regel allns torechtklöönt, ohn‘ dat de Huussegen ut‘ Gliekgewicht kümmt. Dat kann een meist langwieli vörkom‘, wenn man dor över nodinkt, wo eenig wi beiden uns sünd. Wenn dor ni de Urlaub weer – beter geseggt de erste Dag vun‘ Urlaub. Dat is würkli jedet Mol datsülbige: Wenn dat in Urlaub gohn schall denn hangt al morns no’t Opstohn so’n unscheuned Knistern in de Luft, un wi kiekt beide ut de Plünn as ’n Koh wenn’t blitzt.
Jede Froog vun den een‘ kümmt den annern denn vör as wurr man dör de verdröögte Bloom seggen: „Segg mol, kann dat angohn, dat Du ni ganz schier in Kopp büst?“ Un jede Antwoord heuert sick an, as’n Beleidigung. Is echt wohr.
Solang wi noch in’t Huus sünd, hebbt wi uns tomeist noch so jüst un jüst in de Gewalt. Overs wenn wi denn In’t Auto sitten doht… oha. Wenn wi Glück hebbt, schafft wi dat noch bet no de Autobohn-Opfohrt, overs denn geiht de Bomb‘ hoch. Garanteert.
Haueha, hebbt wi uns denn in de Flicken. Denn bölkt wi uns an as twee Besopene Priesboxers, un wi sünd an quarken as twee lütte Göörn in Kinnergoorn: „Jo wenn dat so is, denn künnt wi je ook glieks weller no huus fohrn!“ „Jo denn dreih doch üm!“ „Dat geiht fuurts los, de näste Utfohrt is unse!“ „Du wullt doch nu wohl ni echt ümdreihn!“ „Dat warst Du al beleven…“ Wi dreiht denn natüürli ni üm. Overs so 20 Minuten duuert dat Spektokel jedet Mol.
Achteran entschülligt wi uns denn beide, un denn hebbt wi uns weller leev un dat ward ’n richti scheun‘ Urlaub. Dösig, ne. Geiht dat annere Poore jüst so? Veellicht schulln wi bi’t näste Mol eenfach de ersten 20 Urlaubs-Kilometers getrennt fohrn…

In düssen Sinn