Poznámky k epizodě
Man mutt sick je mitünner doröver wunnern, wat de Breegen, also dat Gehirn, allns kann, ne. To’n Bispeel, wenn dat dorüm geiht, sick op wat to besinn‘, sick an wat to erinnern.
So kann ick mi genau op mien Öllern besinn‘, liekers mien Vadder al teihn un mien Mudder al 15 Johr ni mehr op de Welt is. Ick kann ehr Stimm‘ in Kopp heuern, wenn ick dat will, un ick kann ehr Snuten ganz genau vör mi sehn – also, vör mien „geistiged Oog“ – as man so seggt.
Mien Breegen mokt dat mögli, dat ick se lebenni sehn un heuern kann, wenn ick dat will. Dat finn ick ’n ganz wunnerbore Sook, mutt ick seggen.
Liekers hett dat mit dat Erinnern overs ook sien Grenzen. Man kann sick nömli op keen Gesmack besinn‘ un ook ni dorop wo Sooken rüüken doht. Echt ni. Ju künnt dat je direkt mol versööken. Stellt sick mol vör, wo ’n scheun‘ frischen Appel utsüht, un wo sick dat anheuert, wenn Ju dor rinbieten doht. Un? Bild un Ton dor? Jo? Schier.
Nu stellt sick ook noch vör de „geistige“ Nees vör, wo so’n scheun Appel rüükt un mit de geistige Tung, wo he smeckt. Na? Kümmt wat? Nä? Na kiek mol an.
Dat Smecken un dat Rüüken kann twor veele Geföhle un annere Erinnerung‘ utlösen – to’n Bispeel, wenn man ’n Paföng rüükt, dat man mit ’n fröhere Romanze verbinnen deiht. Dor kümmt veele Billers un annere Erinnerung hoch. Dor kann de Puls sogor vun no boben gohn. Overs man kann sick den Duft vun dat Paföng ni eenfach so vör de geistige Nees holn as ’n Bild. Geiht ni.
Ick meen, is je ook good so. Ick heff dat leever, wenn een‘ eenfach so dat Lachen anfangt, weil he an ’n ulkige Situatschoon dinkt, as wenn de Besöök an Disch dat Spiegen anfangt, weil he sick jüst vörstellt hett, wo Kattenschiet rüükt.
Overs – Oogenblick mol. Worüm is dat eegentli so? Weer dat fröher veellicht anners? Steekt dor an’t enn de Paföng-Industrie un de Eetens-Konzerne achter? Hebbt de uns heimli ümbuun loten, dormit wi jo jümmers fein ehrn Krom köfft, anstatt em uns eenfach vörtostelln? Dat weer je ’n Schandol. Nää, ick glööv, dat is eenfach so, as dat is…
In düssen Sinn
Web: de-doeschkassen-boyens-medien.blogs.audiorella.com

